अग्निवीर प्रशिक्षणावेळी जवानाचा उष्माघाताने बळी, धुळ्याच्या २१ वर्षीय तरुणाचा नाशकात अंत

नाशिक : अग्निवीर भरती अंतर्गत प्रशिक्षण घेणाऱ्या जवानाचा उष्माघातामुळे मृत्यू झाला. नाशिकच्या आर्टिलरी सेंटरमध्ये ही धक्कादायक घटना घडली. हर्षल संजय ठाकरे (वय २१ वर्ष, आर्मी नं. I ३४५१७४६) असे निधन झालेल्या जवानाचे नाव आहे. मयत जवान हे मूळ धुळे जिल्ह्यातील रहिवासी होते.

उलट्या व ताप याचा त्रास झाल्यामुळे हर्षल ठाकरे यांना आर्टिलरी रुग्णालयात दाखल करण्यात आले, मात्र वैद्यकीय अधिकाऱ्यांनी त्यांना मयत घोषित केले. या प्रकरणी नाशिकमधील देवळाली कॅम्प पोलिस पुढील तपास करीत आहेत.

नवी मुंबईतील खारघर परिसरात आप्पासाहेब धर्माधिकारी यांना महाराष्ट्र भूषण पुरस्कार प्रदान करण्यासाठी आयोजित कार्यक्रमात उष्माघातामुळे मोठी दुर्घटना घडल्यानंतर आता नाशिकमध्येही असाच प्रकार उघडकीस आला आहे. लष्करी प्रशिक्षण कालावधीत जवानाला उष्माघातामुळे उलटी व तापाचा त्रास झाल्याची माहिती आहे.

हर्षल ठाकरे यांना त्रास होत असल्याने लान्स नायक नरेंद्र सिंग यांनी त्यांना आर्टिलरी सेंटरमध्ये दाखल केले. तिथे डॉ. भरत शिंदे यांनी ठाकरे यांना तपासून मयत घोषित केले. या प्रकरणी आर्टिलरी सेंटरतर्फे लेखी माहितीद्वारे पोलिसांना कळवण्यात आले आहे. त्यानुसार देवळाली कॅम्प पोलिसांनी हर्षल ठाकरे यांच्या मृत्यू प्रकरणी अकस्मात मृत्यूची नोंद केली आहे.

इतर जवानांची आरोग्य स्थिती व हर्षल ठाकरे यांना उष्माघाताचा त्रास का झाला, याबाबत अद्याप माहिती समोर आलेली नाही. देवळाली कॅम्प पोलिस पुढील तपास करीत आहेत. मात्र, या दुर्दैवी घटनेमुळे नाशिकमध्ये शोक व्यक्त केला जात आहे.आज सकाळी अकरा वाजता संपूर्ण गावात शहीद अग्नीवीर हर्षल संजय मराठे यांची अंत्ययात्रा काढण्यात आली त्यानंतर पार्थिवावर मोठा भाऊ गौरव मराठे यांनी अग्नीडाग देऊन शासकीय इतामात अंत्यसंस्कार करण्यात आले.

शिंदखेडा तालुक्यातील वरुळ गावातील मराठे कुटुंबातील शहीद हर्षल संजय मराठे यांनी आपल्या जिद्द चिकाटी आणि देशसेवा करायची ह्या हेतूने सतत मेहनत घेऊन अखेर डिसेंबर महिन्यात अग्नीवीर परीक्षा उत्तीर्ण होऊन १ जानेवारी रोजी नाशिक येथील देवळाली कॅम्प येथे भारतीय सेना दलाच्या चार वर्षे कालावधीच्या अग्नीवीर प्रशिक्षण काळासाठी एक जानेवारी रोजी रुजू झाला होता.

आपल्या कै. संजय जयराम मराठे वडीलांचे स्वप्न साकार करण्यासाठी व आई ज्योतीबाई संजय मराठे (अंगणवाडी मदतनीस ) भाऊ गौरव संजय मराठे, काका सुभाष जयराम मराठे, रमेश जयराम मराठे, एकनाथ संजय मराठे अशा कुटुंबात सहवास लाभला असताना देशसेवेसाठी लढणाऱ्या वीर जवानावर आज काळाने घाला घातला.

काल ही दुःखद बातमी जेव्हा वरुळ गावात आली तेव्हा संपूर्ण गावासह तालुक्यात हळहळ व्यक्त होत शोककळा पसरली. कालपासूनच वरुळ गावात मराठे कुटुंबातील नातेसंबंधातील व अनेक समाजातील नागरिकांनी मोठ्या प्रमाणावर गर्दी केली होती. आज सकाळी अकरा वाजता नाशिक हुन शहीद अग्नीवीर हर्षल यांचे पार्थिव आणण्यात आले. त्यावेळी आपला मुलगा देशसेवेसाठी गेला असताना अचानक त्याचे पार्थिव पाहून आई ज्योतीबाई मराठे व भाऊ गौरव मराठे यांनी टाहो फोडला मराठे कुटुंबातील सदस्यांसह गावातील मित्र मंडळ, नागरिकासह समस्त महिलांच्या डोळ्यात अश्रू अनावर झाले.

यावेळी सजविलेल्या ट्रॅक्टर वर पार्थिव ठेवून संपूर्ण गावातुन शोकमय वातावरणात मिरवणूक काढण्यात आली. ह्यात संपूर्ण गावातील महिला सह परिसर तालुक्यातील सर्वच स्तरातून तसेच शिंदखेडा पोलीस स्टेशनचे पोलीस निरीक्षक सुनील भाबड व समस्त कर्मचारी व तहसील विभागाचे नायब तहसीलदार बन्सीलाल वाडीले, मंडळ अधिकारी एच टी कोळी सह अधिकारी व कर्मचारी, धुळे जिल्हा सैनिक कल्याण संघाचे रामदास धनराज पाटील, नाशिक देवळाली कॅम्प चे लष्कर जवान सह शिंदखेडा तालुक्यातील सर्व आजी माजी सैनिक सहभागी झाले होते.

त्यानंतर शहीद अग्नीवीर हर्षल मराठे यांच्या पार्थिवावर शासकीय इतामात अंत्यसंस्कार करण्यात आले. अंत्यसंस्कार ठिकाणी नागरिकांसह महिला देखील मोठ्या संख्येने उपस्थित होत्या. गावात ही पहिलीच घटना असल्याने आणि आज साडेतीन मुहूर्तांपैकी एक अक्षय्य तृतीया सणाच्या दिवशी परमेश्वराने असा प्रसंग आणल्याने संपूर्ण गावात चुल देखील पेटली नसल्याने शोककळा पसरली होती.

Similar Posts

Leave a Reply

Your email address will not be published. Required fields are marked *