मुंबईत बायकोच्या बाॅयफ्रेंडसोबत मित्राच्या खोलीवर गेला, वाटलं बायको सुधारलं…बाॅयफ्रेंडला शांततेत मिटवायला लावु….
मुंबई: प्रेयसीच्या पतीची हत्या केल्याप्रकरणी २६ वर्षीय प्रियकराला अटक करण्यात आली आहे. मुंबईच्या पश्चिम उपनगरात असलेल्या बोरिवलीत हत्या करुन मृतदेह स्कूटरवरुन काशिमिरा इथे नेण्यात आला. सुरेश कुमावत असं आरोपीचं नाव आहे. त्यानं सुरेश प्रजापतीची हत्या केली. दिनेशच्या कुटुंबियांची दिशाभूल करण्यासाठी त्यानं त्याच्या मोबाईलवरुन नातेवाईकांना मेसेज केले. आपण आत्महत्या करत असल्याचं मेसेज त्यानं केले. या संपूर्ण प्रकरणाला आत्महत्या भासवण्याचा प्रयत्न करण्यात आला.
पोलिसांनी ५० सीसीटीव्ही फुटेज आणि कुमावतचे कॉल रेकॉर्ड्स तपासले. दिनेश प्रजापतीचं स्नॅक्सचं दुकान आहे. आपल्या पत्नीचे कुमावतसोबत विवाहबाह्य संबंध असल्याचं प्रजापतीला समजलं. कुमावत हा सीसीटीव्ही तंत्रज्ञ आहे. १ जूनला प्रजापतीनं कुमावतला बोलावलं. बोरिवली पूर्वेकडील राजेंद्र नगरमध्ये असणाऱ्या चाळीत त्यांची भेट झाली.
राजेंद्र नगरमधील चाळीत कुमावतच्या मित्राचं घर आहे. त्याची चावी कुमावतकडे होती. मित्र घरी नसल्यानं कुमावतनं प्रजापतीला मित्राच्या घरी नेलं. दोघांचा वाद झाला. यानंतर कुमावतनं प्रजापतीच्या डोक्यावर हातोड्यानं वार केले. या हल्ल्यात प्रजापतीचा मृत्यू झाला.
चाळीबाहेर असलेल्या कॅमेऱ्यात दोघे मोटारसायकवरुन येताना दिसले. पण प्रजापती बाहेर जाताना दिसला नाही. त्याउलट कुमावत प्रजापतीच्या दुचाकीवरुन जाताना दिसला. कुमावतनं प्रजापतीची दुचाकी घोडबंदर रोडला सोडली आणि बोरिवलीच्या चाळीत परत येताना गोणी आणल्याचं पोलीस तपासातून उघड झालं. पुढच्या काही तासांत त्यानं प्रजापतीचा मृतदेह गोणीत बांधला. संध्याकाळी साडेसातच्या सुमारास कुमावतनं प्रजापतीचा गोणीत भरलेला मृतदेह त्याच्या स्कूटरवर पुढील भागात असलेल्या मोकळ्या जागेत ठेवला.
काशिमीरात असलेल्या वन विभागाच्या जागेत झाडं लावण्यासाठी खड्डे खणण्यात आल्याची माहिती कुमावतला होती. तिथल्याच एका खड्ड्यात त्यानं प्रजापतीचा मृतदेह टाकला आणि मातीनं खड्डा भरला. यानंतर कुमावतनं घोडबंदर रोडवर प्रजापतीच्या मोबाईलमधून एक व्हिडीओ शूट केला. त्यानं हा व्हिडीओ प्रजापतीच्या नातेवाईकांना पाठवला. वर्षभरापूर्वी माझ्याकडून घोडचूक झाली. मला तुम्हा सर्वांचा निरोप घ्यायचाय, असा मेसेज मारवाडी भाषेत टाईप करुन त्यानं प्रजापतीच्या नातेवाईकांना पाठवून दिला. यानंतर त्यानं मोबाईलची विल्हेवाट लावली.
प्रजापतीचा शोध लागत नसल्यानं त्याच्या भावानं २ जूनला समता नगर पोलीस ठाण्यात तक्रार नोंदवली. यानंतर पोलिसांनी सीसीटीव्ही तपासले. त्यात प्रजापती आणि कुमावत बोरिवलीच्या चाळीत एकत्र जाताना दिसले. प्रजापतीचे कॉल रेकॉर्ड्स तपासण्यात आले. त्यानं शेवटचा कॉल कुमावतलाच केला होता. त्यामुळे पोलिसांनी कुमावतला चौकशीसाठी ताब्यात घेतलं. त्यानं पोलिसांची दिशाभूल करण्याचा प्रयत्न केला. प्रजापती समुद्रात पडला आणि बुडाला अशी कहाणी त्यानं पोलिसांना ऐकवली.
समुद्र किनारी असलेल्या १६ पोलीस ठाण्यांशी संपर्क साधण्यात आला. मात्र समता नगर पोलिसांच्या हाती काहीच लागलं नाही. या दरम्यान प्रजापती आत्महत्या करणार असल्याच्या मेसेज आणि व्हिडीओबद्दल पोलिसांना समजलं. प्रजापती कुमावतसोबत बोरिवलीच्या चाळीत १ जूनच्या संध्याकाळी आला. तिथून तो बाहेर पडलाच नाही. मग त्याच रात्री घोडबंदर रोडवरुन प्रजापतीच्या मोबाईलवरुन नातेवाईकांना व्हिडीओ कसा पाठवला गेला, असा प्रश्न पोलिसांना पडला. यानंतर पोलिसांनी कुमावतची कसून चौकशी केली. त्यावेळी त्यानं हत्येची कबुली दिली. चाळीतील घरात प्रजापतीचा खून करुन मृतदेह काशिमीरात पुरल्याची माहिती त्यानं दिली. त्यानंतर पोलीस काशिमीरात पोहोचले. तिथे त्यांना प्रजापतीचा मृतदेह सापडला.
